LAMKA POST: JULY 31, 2007

Die-in-harness Schemes

Lamka, July-30: Director of Personel & Administrative Reforms, Government of Manipur in June 6 a thusuah a bawlna ah, June 6, 2002 apan December 16, 2006 kikal a Die-in-harness scheme a dia application pelutte a zat theihlouh hi’n taklang hi.

Hiai toh kisai application thak pe nuamte’n August 6, 2007 tan in affidavit bawl sak in piak lut theih ding ahi’n leng taklang hi.

Friendly Match kimawl ding

Lamka July 30: New Lamka a PT Sports Complex ah zingchiang sunnung 3:00 in New Lamka Youth Club (NLYC) XI leh Bungmual Youth Cub (BYF) XI te’ Friendly Match kimawl ding uhi.

RDC a AC te bawlhoih

Lamka July 30: Lamka Damdawi Inn huangsung a Regional Diagnostic Centre a Air Conditioner kithuah teng a Copper wire teng apaisa July 16, 2007 zan kal a a kiguk mangvek ziak a hun bangtan hiam CD4 Count Machine zattheihlouh a om pen zan in bawlhoihta uhi. Hiai AC te bawlhoihna in Rs. 10,000/- vel bei hi in Med. Supdt. apan in thutut kingah hi.

Selection Board meeting

Lamka July 30: Sub-Divisional Selection Board for Award of State/National Award to Teachers a member teng in tuni sunnung dak 12:30 in ZEO/CCpur Chamber ah meeting uhi. Hiai hun ah State/National Teacher Award 2007 a sang dia recommend ding telkhiatna nei uhi. Hiai hun ah DI teng tel uhi.

Sunna

Lamka July 30: Mrs.Chingkhoman (52)W/o Pumkhenthang of Vengnuam New Lamka zan nitak dak 11:30July 28, 2007 nitak dak 9:00 in Sungna in si a zan sunnung in New Lamka YPA Hanmual ah vuiliam in om hi. vel in kalna in si a tuni sunnung in New Lamka YPA Hanmual ah vuailiam in om hi. Mr. Pauzagin (82) E/o. Letkam of Sahei Road apaisa

PPE Kit tamtak hongtung, Vatawt si 1 enchian

Lamka July 30: Manipur a Avian Flu om toh kiton in Vety. & AH Department nuai ah RR Team tamtak bawl khiat in om hi. CCpur a Vetinary Joint Director nuai ah leng Rapid Response Team (RRT) 8 bawl akhiat hi a huaite zat ding Personal Protective Equipment (PPE) Kit tamtak zan in Lamka puaktung in omta hi.

Avian Flu ziak mah in Lamka khopi kiimkot a khua 81te ah huangvulh Ak leh Vatawt banah Vapaal leh adang dangte simna/Rapid Census neih in om hi. Hiai Census dungjui in Khua/Veng 81 sung ah Ak 24,383 om a, Vatawt 12,669 leh Vapaal leh adangdang gawmkhawm 819 om hi. Huailou in Khumujamba Leikai a Mr. M. Jadumani Singh in Vatawt 10 a khoite lak a 2 zan nitak in si a Vety. Departmentte kiang a Report a piak dungjui in Vetinary Officer Dr. T. Dorendrojit Singh in tuni’n huai Vatawt site post mortem va bawl a huai ah vatawt site Avian Flu ziak hilou a Duck Viral Heppatitis ziak a si hidan in report pia hi.

Tuilawng 12 kigu

Lamka July 30: Bungmual khosak Tipaimukh Road zul a Lamka khopi tuineek ding zawlna Tuilawng (150 mm CI Pipe) 6 apaisa July 28, 2007 in meltheihlouh pawlkhat in gumang uh a huaibanah tuni in tuilawng 6 mah gukmang in omnawn hi. Hiai toh kisai in PHED a AE in Lamka Police ah tuni sunnung in report pia a Police in suizui lel uhi. A mat khiak pah uh lamen phot ni.

Scooter accident ah 1 liam

Lamka July 30: Mr. Lunzapau (45) S/o. Nengkhokhai of Tuaibuang zan zingkal dak 9:30 vel in Tedim Road a scooter a tailai Zouveng lutna bul lak ah Cycle khat toh kiphukha in kipuuk in a a nugguh veilampang 2 a tahtan banah a veilam khuuk lak tatliam kha in Lamka Damdawi Inn ah etkol in omlel hi.

Shaktiman Ak pua man

Lamka July 30: Lamka Police in tuni sunnung dak 2:30 vel in Police Station koanglak ah Broiler AK 28 pua Shaktiman (MN02 4903) man in thudotna aneihnung un khahkhe nawn uhi.

Thukiza dan in shaktiman bel Tuibuang a om 8 GR te’n Henglep Sub Division a 8 GR Outpost a omte Ration ding puak dia a zat uh hi a huai Akte leng 8 GRte puaksak ahihdan leh Avian flu ziak a District sung a Aak puaklut kham ahihma a Tuibuang 8 GR te kep ahih chet ahihnung in khahkhe nawn uhi.

Sub-Dealer leh Rationing Agents

Lamka July 30: Distrit Level Selection Committee, CCpur in 2007-08 sung a SK. Oil Sub-dealer ding leh Fair Price Shop a Rationing agents telkhiakna zouta in a kisaipih a theinuamte’n Notice Board ah etheih ding in takkhiak hita hi.

Hiai toh kisai thusuak in a taklatna ah, inkuan khat in kha khat in S.K. Oil litres 4, ration card tungtawn in ngah thei ding a, PDS antang leng inkuan khat in kha khat in Kgs. 35 ngaih theih ding hi’ leng taklang hi.

Sub-dealer ding leh Rationing agents dia telkhiak a omte’n a kinlam a agreement sign ding in District Supply Officer, CCpur kimuhpih ngai ding hi’n leng thusuak in taklang hi.

KSO in Dr. T.S. Gangte suun

Lamka July 30: Kuki Students’ Organization (KSO) Director of the State Higher Education Deptt. len lui Dr. T.S. Gangte, July 29, 2007 a damlouhna ziak a a sihna ah suun mahmah uh ahihdan thusuah bawl uhi.

Thusuak in a taklatna ah, Dr. T.S. Gangte in Kuki te a dia thil thupi tamtak a sepkhiakte Kuki te kia hilou in Manipur a om tengteng a ding in mangngilh theih vual hilou ahihdan taklang hi.

Mizoram apan Veterinarian 2

Imphal, July-30(NNN): Manipur a Bird Flu om toh kisai in hiai natna toh kisai theichian ding leh kivenkholh dingdan toh kisai in tuni’n Mizoram apan Veterinarian 2 Imphal hong tung uh hi’n thutut kingah hi.

Thutut kingah dan in, Manipur a bird flu toh kisai in tuma lam inleng Sikkim apat Bird Flu expert team khat hong tung khinta uh hi’n kigen hi.

Deptt. of Forensic Psychology hon thak hiding

Guwahati, July 30 (NNN): Department of Forensic Psychology kichi department thak, Kahilipara, Guwahati a Forensic Science Laboratory (FSL) in hongkhe dek a, huai in crime toh kisai case-te hoihtak a saifel nang a panpih mahmah ding a lamet ahi.

FSL apat thusuak in a taklat dan in khantouh dan dungzui in tualthahna leng pung hat mahmah a, hiai department thak in tualthahna leh mahni kithahna case-te suichet leh theihsiam nang in hon pahpih mahmah ding ahi chi hi. Aban a genzelna ah, hiai deptt. in ‘thutak khawl’ (lie detector) leh ‘khuak etna khawl’ (brain mapping) vanzat neita a, govt. in approval a piak hunhun chiang in nasep patpah theih ding a, a poimoh leh maban a vanzat hoihzawte leikhiak a hiai deptt. upgrade theih leng hidi’n taklang hi.

Assam ah crime in punlam nawt semsem a, Assam Police CID in a chiamteh dan dungzui in 2002 in mahni kithat pasal 1702 leh numei 808 om a, 2003 in pasal 1976 leh numei 920 om hi. 2004 kum in ahihleh neuchik kiam zek in pasal 1945 leh numei 894 in amau hinna mah kilak uhi. Himahleh 2005 in hong pung nawn in pasal 1951 leh numei 895 in kaltou a, 2006 in bel tam petmahta a pasal 2116 leh numei 915 te amau leh amau kithat uhi.

Sum Teng 5000/- in CDBA panpih

Lamka, July 30: Churachandpur District Badminton Association (CDBA) in final programme July 28, 2007 a aneihna uah hiai a Guest of Honour dia seh a om Mr. T. Khanthang of Paite Veng in amah tel thei kei mahleh CDBA panpihna ding in Rs. 5000/- pia hi’n thu khonung kiza hi.

Thutut kingah dan in, Ocotber 2007 chiang inleng Badminton Tournament sai nawn ding ua, tua kia hilou in All Manipur Hill District Badminton Tournament leng CDBA in zintun sawm uh hi’n leng kigen hi.

Dimapur ah July 31, sunma dak 11:00 in IM leh GoI kihou ding

Dimapur, July 30 (NNN): NSCN-IM leh Govt. of India in 1997 kum a Cease Fire agreement a neih zoh nung ua Nagaland a khatveina ding in zingchiang Sepnawnni zinglam dak 11:00 in Dimapur ah NSCN-IM leh Govt. of India palaite’n kihouna nei ding uhi.

Thutut kingah in a taklat dan in Nagaland Commissioner T N Mannen in a genna ah Govt. of India palai ding in Union Labour Minister, Oscar Fernandes, Centre’ Interlocutor K. Padmanabhaiah, Secretary Intelligence Bureau Ajit Lal leh Joint Secretary, Intelligence Bureau, Naveen Verma zingchiang zingkal dak 9:30 in Dimapur airport hongtung ding ua, kihouna a neih chiang un Ceasefire omlel July 31 a bei ding pen extend nang toh kisai leng gen khak hiding chi hi.

Kihouna neih nang mun toh kisai Mannen in a dawnna ah, security toh kisai ahihziakin genkhiak theih hilou chimahleh Dimapur a Circuit House ahihkeileh Chumukedima Police Complex khat zawkzawk hidia gintak ahi.

Thutut kimudan in kum tamtak nung a, Nagaland a kihouna om masak nang himahleh kihouna ah Nagaland Govt. kihellou in security leh lam tuamtuam a panpihna chauh peding hidan in gen a, huai banah, kihouna a NSCN-IM lam makaih ding in NSCN(IM) Chairman uh Isak Chishi Swu leh a General Secretary uh Thuingaleng Muivah banah NSCN Emissary, V S Atem pang ding uh hidan in leng gen hi.

Hichibang a Govt. of India leh NSCN-IM in kihouna a neih dek uh toh kituak ding in Naga Hoho in zingchiang, Sepnawnni zinglam 9:30 apat Dimapur a City Tower ah peaceful rally nei ding uh hidan in leng thutut kingah hi.

Tuma zek in NSCN-IM in Camp Hebron, Dimapur ah 6th Naga Consultative Meet sai uh a, huai a Naga pawlpi tuamtuam leh heutu tuamtuam paikhawmte’n Cease Fire hun beidek pen extend ding toh kisai leng ngaihdan ana genkhawm khinta uhi.

Manipur a om Nagate thum ding in ngen

Imphal, July-29(NNN): United Naga Council (UNC) in thusuah a bawlna ah, July 31, 2007 a Dimapur, Nagaland a India palai leh Naga palaite kihouna in gahsuah hoihtak, mihingte gintak khel a thil kipahhuai lamdangtak a gahsuah theihna ding in Manipur a om Naga mite’n hiai hun a thumna nei a, Van Pathian sam chiat ding in ngetna bawl uhi.

Cabinet in Census report- 2001 pomlou

Imphal july 30: Ninth Manipur Legislative Assembly a, emergency second session zingciang July 31 apat August 2, 2007 tan om ding toh kisai in, tuzinglam in Chief Minister Office ah Cabinet Minister te’n meeting poimohtak nei uhi.

Hiai hun ah, assembly session sunga genkhom ding, Manipur a assembly constituencies te Delimitation bawlna ding a Register of Census in Manipur Census report, 2001 asuah pen pom hithei lou dingin thupuk uhi.

Hiai assemly session hun sungin Salary & Allawances of the Chairman, Manipur Legislative Assembly (Hill Areas Committee) bill, 2007 leh govt. business leh private member business tuamtuamte genkhom hiding hi.

Hichibang kal ah, Assembly Speaker Dr. S. Budhichandra Singh in, Deputy Speaker teel ahihma, Singjamei MLA I.Hemochandra Singh in Chairman, Committee of Privileges and Ethics, Manipur Legislative Assembly dinmun len dingin thusuah bawl hi.

Delimitation ding toh kisai in, Manipur Chief Minister O. Ibobi Singh in zan nitak in, political leader tuamtuam toh meeting poimohtak khat Law minister Th.Debendra office ah neikhom uhi. Hiai hun ah delimitation issue toh kisai a, govt. dinmun ding nouneltak in genkhom uhi. Hiai meeting ah opposition lam apat MLA O. Joy, Dr. L. Chandramani,

Radhabinod Koijam MLA ban ah Advocate General of Manipur te leng kihel uhi. Assembly Constituency delimitation bawl theih louhna ding jiaka gen a omte bel, 2001 census pansan a bawl hileh, phaijang a AC 40 omte 37 in kiamsuk dinga, singtang a AC 20 omte 23 in pung ding chih ahi.

Bird Flu mihing a akai louhna dingin Health deptt. in panla – Ph.Parijat

Imphal july 30: Manipur a Avian Influenza (Bird Flu) natna H5N1 om chih chet ahihnung July 26, 2007 apat Health department in hiai natna mihing a, akai louhna dinga pan naktak a la ahihdan, tuni sunnung dak 2.30 in Health & Family Welfare Minister Ph.Parijat in Old Secretariat a, ama office ah thuthak saimite kiang ah gen hi.

Minister in agendan in, hiai Bird Flu apat kivenna dia health department in Rs 24.29 lakhs release ahihdan leh Govt. of India nuai a Health & Family Welfare in leng apoimoh bangbang van tuamtuam Rs 40 lakhs manvel honpia uh ahihdan gen hi.

Vety. & AH department nuai a Ak leh Vasa sumang ding RRT kibawl khia bangin, Health Department nuai ah leng RRT team 20 bawl khiak a om hidan in Minister in gen hi. Hiai team 20 te, team khat jel ah Medical Doctor khat, Health Supervisor 3 leh health worker 30 jel kithuah in, personel 680 zat in om uhi. Hiai Health RRT ten tuni chiangin, Bird Blu

theihkhiakna mun, Chingmeirong apat 3km sung ah Inn tuamtuam 45032 phata ua, tua ah mihing 2,35,161,000 bang enkheta uhi. Hiai munte a michih envek hilou in, Inkuan a kuahiam hiai natna toh kisai a kimuang moh omte leh a health status te uh lak hijel chih ahi. Hichibang kal ah, Bird Flu ziaka, mihing alohsawn louhna dia health department in pan alak dan enkaitu dingin, Govt. of India nuai a Health & FW apat official Dr. P. Rabindra leng Imphal ah omlel a, aman agenna ah, RRT te nasep lungtun huai asak dan thuthak saimite theisak hi.

Hiai RRT ten July 26, 2007 apat sim in ni 10 sung health check up neitou ding ua, tuni tan a muanmoh bangzah hiam screening leh medical examinine hoihtak bawl ahihnungin Bird Flu natna vei chih theihkhiak om tadih lou ahihdan leng Minister in gen hi. Chingmeirong apat 3km ban 10km tan sung ah leng surveillance bawl hitou jel a, apoimoh leng mansa in RRT 20 stand by in omlai chih ahi. Minister in agenna ah, CCpur a Bird Flu natna kigen pen diklou leh blood sample test ahihnunga negative ahihdan leng gen hi. Kuahiam bird flu natna vei om khak ding venna in JN leh RIMS ah isolation ward honkhiak in om a, JN hospital a respiratory ventilator khat neihsa ban ah nih leithak hi a, hiai vanzat pen khat ah Rs 9 lakhs vel man hi a, RIMS ah bel hichibang 7 om hidan a gen leng ahi. Health toh kisai a thu kan

chetnop nei leh kan theihna dingin Health department in, Lamphelpat a R & D Wing ah control room khat hongkhia a tua a telephone number bel, 0385-2416922 leh 2414796 ahi. Tuni a Health & FW minister in thuthak saimite a kimuhpihna hun ah, Health Services a Director Dr.Th.Suresh Singh leh Health Secretary P.Vaiphei IAs te leng kihel uhi.

Ak leh Vatot 149294 thah hita; A vuina mun complaint om

Imphal july 30: Bird flu natna ziaka Ak leh Vatot te hihmang ding chih govt. thupiak dungzui in Vety. & AH nuai a RRT te’n July 26 apat tuni July 30 sunnung dak 3.30 tan in Imphal West leh Imphal East sung ah Ak leh Vatot kigawm in 149294 thah ta ua, Ak leh Vatot tui leng 20249 leh Ak ann 11615kgs leng sukmang in omta hi.

Hichibang kal ah, Chingmeirong a Firing range lui mun, July 27 & 28 a Ak leh Vatot kigawm 1000 val ding vuina mun, akiang naipen a tenna Inn metre 100 vel a gamla himahleh, tuni chiangin namse mahmah hidan in kigen a, amun a mute gendan in sai-ip a koihnate uh leng hoihtak a lei vuh louh jiakin muhtheih ahihban ah tanbul ahihman in vuahtui in hawktui

tuamun apat honpuak a Ak leh Vatot sisante hong luangkhiak ding lauhuai dinmun hidan a om hi’n kigen hi.

Hiai mun a tengte gendan in thil omdan Vety. office a theihsak himahleh office lamte’n ngaihsaklou in nou hoih nasak bangun ana hih un a chih san uh hi’n gen uhi. Raj Bhavan sung ah leng tuni’n Vatot (Meitei Nganu) 16 RRT ten that uh hidan in thutut kingah hi.

Govt. office leh gari te veng hoih dingin theisak

Im phal july 30: Manipur govt. nuai a Principal Secretary (Home) P.B.O.Warjri in tuni a thusuah a bawlna ah, tulel a MEELAL in gari number te a Meitei Mayek gelhna dinga, helna a neih uh toh kisai in, security measures hoihtak lak hidingin taklang hi.

Govt. vehicle peuhmah mun bit a koih ding, huai tuh Battalion/District HQ of District Police/MR/IRB. Police Stations/Out posts leh a kinaipih security omna ah, hichibang mun loute ah venlouh a govt. gari himhim koih hitheilou ding hi’n government thusuak in taklang hi.

Official duty lou ngal a govt. gari zat hitheilou ding, thusuah bawl nung a tuahsia tuak a om leh amau mohna hiding a, chowkidar leh night watchman te pilvangtak a posting mun a om gige ding, office a telephone omte, telephone number poimoh teng toh koih khom ding, a hun hun a zat theih dingin, Fire Service ten leng apoimoh banga nasem dia mansa hihding, patau leh meikang hun a dia security naipenten kithuahpihna piak jel ding leh sensitive mun deuh deuh a security patrolling hihkhauh ding hi’n thutusk in taklang hi.

Mi 2 hawlkhiak in om

Im phal july 30: HLSC Old course examination, 2007 ah, tuni’n chindan hoihlou hih jiakin, Lilong B apat Roll No. 7497 leh Yairipok apat Roll No. 8071 te hawlkhiak hi uh chih Controller of Examination, BSEM apan thutut kingah hi.

WWW.ZOGAM.COM

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: