Zan March 21, 2008 nitak dak 8 vel in Mr.Kakai (28) s/o Satkhojang of D.Phailien Yamaha no.MN 02/6216 atailai Police Station khangdeuh ah mi khat phukha in accident a, amailak naktak aliam in, District Hospital puak tun nungin, tuni’n Imphal ah kipaw suk hi.
Tuni zinglam dak 11 vel in Mrs.Khaitinnieng (70) w/o Nangkhopau of Kangvai a tunu tawh Cycle aki pawlai kia in, a deek tatkha a,District Hospital ah etkawl in om.
Tualou in, tuni mah zinglam dak 11 vel in Baby Letminlien (4) s/o Paugin of Lhajangphai Richshaw atailai accident in amittung veilam liam a, District Hospital ah etkol hilel hi.
Mr.Hranghliana (67) s/o (late) Laikhuma of IB Road a inn tung ua apat tuni zinglam dak 7 velding in kia a, akhut ngawng guh taklam a tahtan ban ah a kawngguh khaanga, tuni’n Imphal ah kipaw suk hi.
Practical exam kipan ding
Council of Higher Secondary Education, Manipur saina nuai a Pawl XII exam zawh ahih tawh kiton in, Rayburn College nuai a Class XII (Arts leh Science) te’n March 25, 2008 apan Practical exam panding uh hidanin thutut kingah hi.
NABARD nuai ah Promotion ngah
National Bank for Agriculture And Rural Development (NABARD) nuai a sem eilam mi 3 in tuni in promotion ngah uh hi’n thusuak kingah hi. Muanhuai tak apan kizadan in, Pauliankap Bulte (Imphal Office), Khamkhogin Vaiphei (Gangtok Office) leh T Kamzalian hidan in kigen a, amau’ Assistant Manager apan Manager ah kaisang vek uhi. Amau’ transfer na mun ding tunung sawtlou in hawmfel hiding in kigen hi.
Korea apan tamtak hongtung ding
Life Word Mission, Korea apan thugentu leh Councellor ding mi 17, March 25 in Seoul apan Lamka hongtung ding uhi. Amau ahongtun ni zan un, Bungmual EBC Biakinn ah, Life word seminar panding ua, March 28 2008 in zousiang ding ua, tua zawh in Mizoram khawpi Aizawl a EBC Biakinn ah Life Word Seminar neizom nawn ding uhi. Bungmual a Life word seminar om ding ah, mi 1800 val in minkhumta ua, register badge neiloute seminar ah teltheilou ding uh hidan in organising committee thusuak in gen hi.
Huihpi in School mutsia
Tuni zingkal baihtak dak 1:30 vel in huihpi hattak nunga, Lingsiphai khua a Paul Lianthang Thangsing in residential School a bawl Immanuel Institute of Learning leh Lingsiphai Government School mutse dimdem hi. Langva tamtak lengkhia a, Electric High tension gui leng at tan kha hi. Huaiban ah Lhajang khua a om Mr.Sehzathang Haokip tenna inn leng huihpi in mutsiatsak gawp hi..
Guta in dawr khat luhnawn
Teddim Road a om Lamka Photographic Service geia Ningboi dawr kichi guta pawl khat in zannitak in luh ua, himahleh, a shutter suse zoulou in, a kawngvang apat in Siikkawi zang in puantamtak gu mang uhi. Dawr sung ah bel lut theilou ua, a pua apat in puan tuamtuam Rs.2000 val man ding gumang thei mawk uhi.
Bike leh Jeep kiphu: Mi khat si
Tuni sunnung dak 1:30 vel in Bethany Christian College maai Teddim Road ah Yamaha RX 100 HR08/4006 leh Jeep Service no. MNS/7527 kiphu kha a, Bike driver Mr.Sagolsem Rajan Singh (27) s/o S.Ibocha Singh of New Bazar kintaka District Hospital puaktun himahleh damzoulou in si hi. Jeep driver Pauthienlal Vaiphai (26) s/o Thangboi Vaiphai of Torbung a Jeep tawh Police Station ah ki pikhe ngal hi. Pauthienlal apat kiza dan in Torbung apat Passenger tamtak tawh Lamka manawh a ahongtailai un,Yamaha ah mi khat hattak in Tuibuong manawn in hongtai suka, Bike mai ah Activa gari tai in, ahihkhakdek tak in Yamaha driver pa tawmkhia a, himahleh a khutnih in a handle khahtuan lou in, a bike kipuk in, a Jeep bawh kha ahihdan gen hi. Ranjan District Hospital Morque ah Postmortem bawl zawh in a sungkuan te kiang ah piak in awm hi. Ranjan ahihleh, New Bazar ah aksa zuak hidanin kigen hi. March 23, 2008 in Ranjan sungkuante mi bangzah hiam Delhi apat Lamka hongtung dingua, huaima in kihouna bangmah omthei nailou ding hihdan in thutut kingah hi. Bike leh Jeep te tu’n Police Station ah awmlel a, Police te’n hiai tungtang ah case khat register uhi. Letzamang APO in agenna ah, mipite’n NREGS nasepna tawh kisai a lungkimlouhna aneih ua leh, singtum, suangtum man mailou a, DC kiang ah complaint letter khe zaw ding in ngetna nei hi.
NREGS thu singtum-suangtum leeng
Muanhuaitak apan thutut kingah dan in, Singngat Hausa Mr.Khupkhanpau in a khua ua mi 354 te’ NREGS ni 10 anasepna lak ua pan, mi khat a Rs.814 lakah Rs.14 Hill House Tax acut ding leh Rs.100 zel mi khat tung ah Village Authority adingin cut a sawm ziak in khaw mipite ut lou in buaina liantak piang hi. Hiai thu ziakin March 20, 2008 nitak dak 6 vel in zukham mi bangzah hiam te’n Hausapa teenna inn suang(stone) in vadeng uhi. Hausapa inn gei apat mi bangzah hiam te’n inn kibuluh dan a ngai in suang mah in ana deng thuk ngal ua, buaina kipan hi. Singngat a om Army te’n buaina mun va delh ngal ua huai apan buaina awlawl a hong veng thei hi’n kigen hi. Buaina ah mibangzah hiam te’n liamna tuak mahle uh, mi 1 kia lupna ngak in om hi’n thutut kingah hi. Hiai thil tung tawh kisai in Sumant Singh IAS, Deputy Commissioner / Churachandpur thupiak dungzui in K.Kabib IPS, SDPO/ Churachandpur, SI Zuola,OC/Singngat, Letzamang APO/DRDA leh a staff mi 3 te’n March 21, 2008 in Singngat khua vadelh ngal uhi. Singngat ah mipi kikhopna nei ua, NREGS nasepna mipi te lakah dotna te Letzamang APO/DRDA in hilhchian hi. Khawmi te’n agenna uah, Hausapa’n NREGS Jobcard tengteng kemvek hi’n ngawhna nei ua, amau khuta pekhe ding a ngetna aneih dungzui un, mipi lak ah Jobcard leh ni 10 a thaman uh Rs.814 piak in om ngal uh hi’n kigen hi.Tulel in Singngat khua ah 1st phase in Jobcard nei mi 354 om ua,2nd phase kaalnawn sung in ni 25 nasep nang sum sanction hiding ua, Jobcard leeng 407 piak hiding uhi.
Fire Brigade Gari kideengsia
March 20, 2008 nitaka mipi buaina a suangtum akiden tuahna ban ah Daikam teenna inn gamkaang apat akat ziak in mipi thangpai te’n Fire Brigade te gari a glass teng suang in dengse gawp uhi. March 21, 2008 in Fire Brigade mini tanker khat Imphal akipan in Singngat tut in awma, akidengse pen leng Imphal ah puak suk in om phot ahihdan thutut kingah hi
Orientation training om
Zomi Mothers’Association HQ leh NABARD te saina in tuni zinglam dak 10 apat in EBC Dorcas Hall,New Lamka ah One day orientation training on SHG for School Teachers neih in om hi. Huai ah Grace Zamnu, Nenem leh Vungi Guite te’n thupi tuamtuam nei in sinsak na nei uhi.
SUUNNA
T.Thawnggin (95) f/o T.Ginkhanmang of New Lamka Vengnuam March 21,2008 zinglam dak 5 vel in teeknat in si a, nitaklam in YPA hanmual, New Lamka ah kivui hi.
IMPHAL NEWS:
Naga numei 2 kaplup in om
Imphal, March 22: Zan nitak dak 10:10 vel ding in Thoubal Wanba Dhaba Oinam Leikai ah Naga numei 2 kaplup in om a, huai in Chandel District sung tuni March 22 in sousang sak mahmah a, thusau zaw a pehkhak ding lauhuai thei dinmun ah omlel hi.
Police thusuak kingah dan in, meltheihlouh galvan tawi lawikhat in zan nitak in Thoubal Police station apan Km 7 vel a gamla Thoubal Wanba Dhaba Oinam Leikai vengsung ah Chandel Naga numei 2, Langhu Esther Anal (30) d/o PS Angno Charengsim of Chakpikarong, Chandel District leh alawmnu Pashel Smawy (27) d/o Ps Angshu of Angal Khunou, Chakpikarong te mulkimhuai tak in that ua, a khebe uleh, a sapum uah liamna ma muhding om a, a lu tang uah thau tang lut hi. Numei nih te ahihleh, sualluih nung a thah a om hiding in ginthu kigen hi.
Tuni in Chandel District Headquarter town Hall ah, Civil Society leh NGO tuamtuam in meeting nei ua, makai poimawh hunkhawp leh student leader te’n leng uap uhi. United Naga Council Chandel District Committee leh Anal Naga Students Union apan makai tuamtuam in thugenna nei ua, mipi paikhawmte’n resolution la in, SPF Government in kintak a tualthat tute a matkhiak ding uh, a kituahpih ex gratia piak ding chih leh thu tuamtuam thupukna bawl ua, Chief Minister kiang ah zingchiang in memorandum pelut ding uhi.
Hiai thiltung tawh kisai in, misi sungkuante Imphal mun a tunlouh ziak un thuchian theih haksa mahmah a, mi 2 te koilam pha a, koilam zuan a, chik a pawtkhia uhiam chih theih hilou hi. Esther in Jeans khekol teng a, alawi nu Pashel in sharwal khekol teeng hi. Thusuak in agendan in, numei nih te underpant ah sisan tanpha baang hidanin gen ua, postmortem bawl a hih zawh chiang in thilteng chiang ding hi’n gen uhi.
RIMS MS tenna inn ah bomb va koih
Imphal, March 22: Regional Institute of Medical Sciences (RIMS) a Medical Superintendent hihna lenlel Dr Y Mohin tenna Inn, Uripok Achom Leikai ah tu nitaklam dak 2 vel in meltheihlouh kinetic Honda san a taai pasal nih in a gate nuai uah, hand grenade khat va koih in, lehkha them, “ Dr Mohin Sathibah” chih kigelh tawh va koih khawm uhi. Police kiang ah thil omdan kintak a zaaksak ahih nung in, Police Commando bomb expert te’n bangmah chi man lou in va la khia uhi. Dr Mohin in ahihleh, zanhal in RIMS ah Press Conference sam in, huai ah helpawlte ziak liauliau a RIMS khak a om ding ahihdan ana genkha hi.
Kiran sih ziak in JAC kibawl
Imphal, March 22: Imphal East Police Commando te’n March 20 nitaklam dak 2:45 vel a Lamlai phatnung Chingarel mun a a kaplup uh KYKL member dia muanmawh Thokchom Kiran (30) s/o Thokchom Rajen of Thongam Leirak, tulel a Kangjabi, Imphal East a om lel sihna ziak in tuni in huai area apan heutu leh Meirapaibii te kipunkhawm in Joint Action Committee kichi khat bawl khia uhi. JAC thusuak in agendan in, tu nitaklam dak 4 apan mipi’n meeting poimawh tak nei ua, mawhna neilou Kiran thah ahih ziak in, Government in a kilawm huntawk thuakpihna leh zangnadopna apiak ding uh ahi chi uhi. Kiran zi in agendan in, a pasal Contractor neukhat ahihdan gen in, Yaoshang ding ziak a sum la dia kuan, a sakhau ah Rs 6,000 leh mobile khat kuah ahihdan gen in, huai teng leng mangvek ahihthugen a, huai ni nitaklam dak 1:30 vel a Imphal East Police Commando te’n a tenna Inn ua pan a va pikhiak uh ahihdan leng gentel hi. Inn sung ah Commando te’n soisa ua, huai zawh in Gypsy khat ah guang in, huai nung kimu kha nawnlou in, sisa in muhkhiak in om maimah chi hi.
Huihpi’n Inn tamtak mutsia
Imphal, March 22: Doordarshan Imphal Kendra in a puandan in, zan nitak leh tuni sunnung in Manipur phaizang bial ah vuahzu, huihpi leh gialpi kithuah naak tak in nung a, huai in Khongham Chuthe khua naktak in nuai a, huai ah sihna leh liamna tuak zee nom kei mah leh, Inn tamtak nuai maat ahihdan puang hi.
Yaoshang thupitak in zang
Imphal, March 22: Hindu-te’ adia Ni poimawh mahmah Yaoshang kichi tuni in Manipur tel in khawvel gam tuamtuam ah zatna om a, huai ah rong tuamtuam a kitheh in, kimawlna om hi. Manipur ah leng Governor tenna Inn, Raj Bhawan ah thupitak in neih in om a, Chief Minister O Ibobi leh Rishang Keishing MP (Rajya Sabha) te’n leng va uap uhi.
Ni 5 om ding Yaoshang festival kipan
Imphal, March-22: Manipur ah Meitei mite laka nop bawlna minthang mahmah Yaoshang festival kichi ni 5 sung om ding zan in kipan hi. Tuni in leng Governor tenna inn Raj Bhawan ah kizang a, Chief Minister O Ibobi leh Rishang Keishing MP (Rajya Sabha) te’n leng va uap uhi. Chief Minister O. Ibobi in Yaoshang Festival tawh kisai in Manipur mipite deihsakna thuchah bawl in a genna ah hibang festival kichi nopna leh kilemna hun hi a, kilamdanna leh kituahlouhnate koihkhia a nopsak khawm hun hi’n gen hi. Yaoshang in itna, kituahna leh ki-unauna omsak a, tulai a kemna leh kituahna poimawh hun laitakin Yaoshang manpha tuamse ahihdan taklang kawm in Yaoshang in Manipur mipite lak ah lemna, nopna leh kipahna tungsak dinga deihsakthu leng puang hi. Yaoshang ziakin Imphal newspaper-te leng March 26,2008 tan suaklou ding hi.
MCS/Jr MCS/MFS prob 35 training ding
Imphal, March-22: Manipur government in MCS/Junior MCS leh MFS probationer kigawm 35 Faridabad(Haryana) a National Institute of Financial Management(NIFM) ah kal 16 (April 7, 2008 akipan July 25,2008) sung “Enhencing Analytical Skills of Rational Decision Making” a tel dingin kuankhiaksak sawm hi. Trainin a kuan dingte lak ah singtangmi DK Thangboi Haokip,MCS; Hmangte Lerte Kom, Jr MCS; HL Jain,Jr MCS; David Kasungnao,Jr MCS; Dangmei Manglem,Jr MCS, KG Daigong, Jr MCS; Sona Khaikhopau Ngaihte, Jr MCS; KF Gangmei,Jr MCS; Tongminlien Haokip,Jr MCS; S. Thienlaljoy Gangte, Jr MCS leh Ms Ngahpi Lhouvum,Jr MCS tel uhi.
———————————————————
Interview om ding
Manipur Express hawm/agent(hawker) dia kingetna pia applicant-te adingin March 24,2008(Seppatni) zinglam dak 11.00 in Editor, Manipur Express office room ah
interview om ding hi.
———————————————————
Nitaklam dak 6.00 apan zing dak 5.00 tan Curfew kikoih nawn:
Chief Minister in Relief Camp tuamtuam enkhia
Imphal, March-22: India gam state dang akipan Manipur a nasem a kilawh a hong om Non-Manipuri kichi Vai(Hindi pau zangte) March 17 & 18, 2008 in a kigawm a mi 15 kaplup ahihnung in state govt in Non-Manipuri tamtak om laite hinna humbit sawm in Imphal, Thoubal, Bishnupur leh CCpur district mun khenkhat ah Relief Camp hong in omsak a, Chief Minister O. Ibobi in zan in huchibang Relief Camp omte abanban a va pha in thil omdan enkhia hi. Aman camp a omte innkuan khat ah Rs. 23,000 pia a, naupang etkol nei nupite leng Rs. 10,000 zel a piak banah Relief Camp omna district a Deputy Commissioner-te kiang ah camp a omte nek-le-tak tasam a koihlou ding in leng theisak hi. Huailou in phaijang bial district 4 ah March 18, 2008 akipan nitak dak 6.00 leh zingsang dak 5.00 kikal Curfew om leng zan in nitak dak 9.00 akipan zingsang dak 5.00 kikal dingin ahun hihtom himahleh govt in security khauhsak poimawhlai hi a thei in tuni akipan thuthak om masiah nitaklam dak 6:00 akipan zingsang dak 5.00 tan mah Curfew koih hiding in thuthak om nawn hi.
Chief Minister O. Ibobi in zan in Imphal a Dharmshala leh Bengali High School a Relief Camp pha masa in huaite non-Manipuri omte dinmun leh nek-le-tak tungtang kanchian a, huai apan CCpur district sung Loktak Project Police Station a Relief Camp vapha hi. Huai khit in Bishnupur Hr Sec School a Relief Camp pha a, huaizawh in Thoubal Hr Sec School leh 3rd IRB a Relief Camp banah Kakching Police Station a Relief Camp omte abanban in phasuak hi. Chief Minister in tutung buaina a site innkuante kiang ah ex-gratia piak hiding leh aliamte leng ki-etkolna din piak hiding ahihdan gen a, govt in amaute bit taka enkol ding uh ahihman in kuamah lauthong leh langkham a omlou dingin leng khamuan hi.
Chief Minister in a genzel danin Greater Imphal area ah tunung sawtlou in Police Check Post thak 42 honthak hiding a, huai ah police personnel 20 apan 40 kikal om ding a, huaite zat ding in Maruti Gypsy 100, Royal Enfield Motor cycle 150 leh gari dang 50 piak hiding chi hi. 5th & 6th IRB Bn tulela training laite April, 2008 bul in zou ding uh a, huaite Police Check Post kihong thak ding 42 ah hawmzak hiding uh chi’n leng CM in gen hi.
Zan in Prime Minister Dr Manmohan Singh makaihna a Union Cabinet meeting zawh in PR Das Munshi in namthil a buaina ziaka thaha omte ex-gratia Rs. 3 zel piak dinga lemsak ahihdan gen a, huai implementing agency dan in National Foundation for Communal Harmony kizang ding a, amau bank account a koihsak in huai tungtawna piak hiding chih gen hi. Hileleng huai thil bel Govt of India in notification a suah hunhun a kizang theipan phet ding hi’n gen a, panpihna ngahte’n source dang apan a muh ding uh dalna bangmah om tuanlou ding chi’n leng Union Minister in gen hi.
EDITORIAL:
Tuni Thupi: “Ka hinna vom hoih inla, hon humbit in aw; zahlak in hon om sak kenla, nang ah ka ginna ka koih ngala..” Sam 25: 20
Damdawi inn leh Press te sukbuai louh hoih
Mihingte hinna dia poimawh mahmah thil thumte- Tui, huih leh ann hi a, huai bangmah in i niteng hinkhua ading leh khawvel changkanna i batna ding in a poimawh mahmah, damtheihna leh newspaper te ahi hi. Laibu gelhtu khat in, “newspaper om louhna gam ahihleh, inn sung tawlet om lou tawh kibang ahi” ana chi hial hi.
Kalkhat leng pai nailou in, Manipur phaizang gam ah Non Manipuri te tamtak thah hi a, tamtak mah in Manipur pawtsan uh chih thu om hi. Hiai buaina thu Loksabha leh Rajya Sabha innpi te ah puaklut in om a, kiselna sousang mahmah chih newspaper tungtawn in i mu hi. Tuaban ah, hiai thu in Manipur mipi su liing zou mahmah in, Manipur assembly member te’n leng mawhpaihthu puang uhi. Hiai thiltunna thu ah, Manipur DGP in KYKL pawl hidanin ngawhna bawl mah leh, KYKL in ahih louhdan uh puang ua, tuaban ah, phaizang helpawl mah UNLF leh PLA in leng kigolh lou ahihdan uh puang uhi. Huchi hita leh, helpawl dangdang in leng kigolh lou uh ahihdan hon puang lai le uh, kua thah hiding hiam chih suikhiak haksa mahmah ding a, kua agency te’n vaite hong thah uh ahi di chih tanpha in leng dotna bawltheih ding in gintak huai mahmah hi.
Hiai thubuai i nawk vingveng lai in, Manipur phaizang leh singtang bial apan pawl tuamtuam in thiltung naktak in mawhpaih uhi. Huchi kawmkal ah, i gennop khat ahihleh, Chief Minister in Meirapaibi pawl a siamtanlouh thu agen ahi hi. CM thugen pe’n adik chi a i pompihna hi pah zawlou in, Meirapaibii te ading in leng ki ngaihtuah tham ching ding i gingta hi. Kuahiam, banghiam a sih chiang in, Meirapaibii pawl ki sa lah mahmah in, JAC tamtak dinkhiak in om ta hi. Himahleh, Bihari (non Manipuri) te hiai zah thah ahih nung in, Meirapaibii te aw ging Manipur mipite’n kizakha lou mah bang hi. State Government ading in leng theihsiam haksa mah ding in a gintak huai hi.
Vaite thahna pe’n tawh ki zawitawn khollou himahleh, tulaitak in Manipur phaizang bial ah thubuai huai mahmah 2 piang nawn ding in kilang hi. Khatna ah, Regional Institute of Medical Sciences tungtang ahi. Centre Government nuai a Union Health Ministry in vangphat huaitak in RIMS pe’n Centre University status a domsang in, hospital vanzat, equipment tuamtuam te, International standard khenkhat tanpha koih in naktak in puah ua, a biiktak in Manipur phaizang mipite ading in vualzawlna thupitak ahi hi. RIMS hospital ahihleh, minthang mahmah in, NE ading in leng a penpen pawl hi a, Mizoram leh mun tuamtuam apan in damlou tamtak etkol khak in om a, RIMS Doctor te siamna leh theihna pe’n State ading in kisaktheih huai khop in om sek hi.
Tutung in helpawl 2 kal a buaina ziak in, RIMS authority te’n ut in ut kei le uh damdawi inn a khak mai uh ngai ding in kilang hi. Phaizang helpawlte’ sum demand ziak in, RIMS asemtute’n vauna tuak mun mahmah ua, tutung chauh hilou in, Director inn tanpha ah hand grenade va present uhi. Damdawi inn i chih damloute etkolna hi a, buaina tuamtuam in Out Patient Department tam veitak khak hi ta a, buaina neuhneuh ana tuak mun mahmah hi. RIMS campus sung ah helpawl leh security tanpha kikaptuahkha in, damloute ading in diipkuat huai hun tam thei mahmah ding in i gingta hi. Bangziak a tuni tanpha state Government in damdawi inn area te peace zone a koih zoulou tel adia chih te ngaihsut tham ching hi.
A nihna ding in, Manipur ah Press leh media te’n helpawl tuamtuam apan in vauna ngah mun mahmah uhi. Adiak in Manipur phaizang a om All Manipur Working Journalist Union leh Editors’ Forum in tamveitak vauna ana muta ua, Media office tuamtuam ah helpawlte’n bomb tanpha va kam kha ta uhi. Helpawl leh helpawl kal buaina ziak in, Press te’n haksatna thupitak ana tuak sek ua, tutung in leng thah ding tanpha in vau in om nawn uhi. I gam a hoihlouh ziak mah in, Centre in ei deihtelna tel hetlou in, Armed Forces Special Power Act kichi hon koih khum in, huai deihlouhna ziak in Irom Sharmila bang in kum 7 hial ann ngawlta mah leh, AFSPA lakkhiakna ding hial in i gam a gal muang naikei chih a chian na ahi mai diam chih theih in om hi.
Press leh Media i chih te’n galvan tawilou in, a galvan uh omsun a pen uleh, computer himai lel ahihna ah, helpawlte tawh kikang thei ding vual ana hilou mah uhi. Manipur phaizang bial ah bangtan Press te’n haksatna tuak ding uh ahia chih theih hilou a, tuadan a apai zom zel leh, Press/media kichi bang leng phaizang bial ah om thei nawnlou khawp ding in om a, a semtute’n leng neekzonna dang a zon uh ngai mail eh kilawmta hi.
Mipite adia poimawh mahmah Damdawi Inn leh Press ahih dungzui in Government in pan naktak a alak a, thil dang zaw gen ngam zezen khang, Damdawi inn te leh Press te tung ah peace zone a puan uh poimawh mahmah hi. Dan leh thupiak a siat chiang in helpawlte ading in Government zahna himhim om lou ahih ziak in, State Government in law and order hoihtak a a etkai uh kisam hilou hiam i chi hi.
——————————————-
Ester Sunday Message:
Sabbath(khawlni) zawh nipi kala ni masapen phalvak in Mary Magdalini leh Mary dang khat in Jesu kivuina hunkhuk veh ding in a kuan uh a; ngaihdih, zinling thupitak hong om a, van akipan Angel khat hong kumsuk a, han kongkhak a suang kikoih a khukkhia a, a tung ah atu hi. Amel omdan khawphia bangin a tang a, a puansilhte vuk vangin a ngou hi. Hankhuk veng a om sepaihte lau in a ling uh a, misi bang mai in a om uhi.
Himahleh Angel in numeite a houpih a, a kiang uah, “Lau kei un, Jesu kilhden a om zong na hi uh chih ka thei; huai ah a om nawn kei a, a gensa bang in a thounawnta hi. A lupna mun leng en himhim un. Huchi’n pai meng unla, nungzuite kiang ah ‘a thounawnta a, Galili gam ah na ma uah a pai, huailai ah na mu ding uh’ chi’n hilh un” a chi hi.
Amau nungzuite hilh ding a a pailai un, Jesu’n amau ana tuak a,…amau a khepek khong a len ua, chibai a buk uhi. Jesu’n a kiang uah, “Lau kei un, pai unla, Galili gama pai dingin ka unaute va hilh un, huai ah kei hon mu ding uh” a chi hi.
– Matthai 28: 1-8 & 9-10
————————————————————
ASI lakna ding Viva Voce kibikhiah
Manipur Police Department a Assistant Sub-Inspector(ASI) lakna ding a Written Test zou district tuamtuam apan candidate-te ading in Kangla a Officers’ Mess ah zinglam dak 9.00 zelin Viva-Voce anuai abangin om ding hi.
March 26, 2008: Imphal West district
March 27,2008: Imphal East & Bishnupur
March 28,2008: Thoubal, CCpur,Chandel
Ukhrul, Senapati& Tamenglong.
MPSC in kum bikhiah thak nawn
Manipur Public Service Commission(MPSC) in Manipur Civil Services Combined Competitive(Preliminary) Examination, 2008 om ding ah upper age limit a bikhiah dan in general category adin kum 30, OBC adingin 33, ST/SC adingin kum 35 chih himahleh March 19, 2008 in thusuah bawlthak in kum 2 chiat behlap hiding chih hi a, application submit hun leng April 19, 2008 tan hithei ding in thusuak om hi.
Financial assistance nget theih
“Modernisation of Handicrafts” for the year 2007-08 nuai ah outstanding craftspersons (adiakin national/state awardee/certififcate winner/govt training centre/institute a training zousa) kuapeuh Embroidery, Doll & Toy, Block printing, Wood Carving & Dance & Costume adia tools & equipment leina ding grant(financial assistance) deihte’n amau tenna district chiat a DIC ah Rs. 50 pia in application form laktheih ding a, DIC in approved scheme a bawl tawh thuahtel in March 26, 2008 tan DIC office tungtawn in submit theih ding hi.
Employment News:
Staff Selection Commission in Directorate of Census Operations, Office of the Registrar General of India nuaia Group ‘C’, Non-Ministerial posts tuamtuam sem ding lakna ding in June 15, 2008 in state leh Union Terrirories capital tuamtuam ah examination conmduct ding uh a, Imphal(Code No. 441), Guwahati-Dispur(Code No. 421), Itanagar(Code No. 401), Shillong(Code No. 451),Aizawl(Code No. 461), Kohima(Code No. 475), Agartala(Code No. 481), Silchar(Code No. 431) leh Dibrugarh (Code No. 425) leng examination centre hiding hi.
1. Statistical Investigators(Grade-III): post 199
Reservation: ST 11/SC 28/50)
Pay: Rs. 5,000-8,000 per month
Age: 18-25 years(ST/SC upto 30 yrs)
Qualification: Master degree in Statistics/Mathematics/Economics from any recognized University.
2. Compilers: post 761
Reservation: ST 40/SC 98/OBC 189
Pay: Rs. 4,000-6,000 per month
Age: 18-27 years(ST/SC upto 32 yrs)
Qualification: Bachelor degree with Economics or Statistics or Mathematics as compulsory or elective subject from any recognized University. ‘O’ level certificate in Computer from an Institute recognized by departments of Electronics, Govt of India is desireable.
Candidate dinga chitna nei a lunglut kuapeuh in application form omsa enton in paper A-4 size zangin ball-point pen zanga fill ngai a, application thonna envelop tung ah bold letter in “APPLICATION FOR THE POST OF STATISTICAL INVESTIGATORS GRADE-III & COMPILER EXAM., 2008” chih gelh ngai a, envelop veilam sik ah capital letter mah in Centre min, centre code leh category leng gelh ngai hi.
Application tawh thuahtel ngaite bel application form ah Central Recruitment fee stamps(CRFS) Rs. 100 man(ST/SC candidate-te adin ngailou) a, application form ah tunai chin a lak passport lemlak 1 belh ngai hi. Post card Rs. 6 mante tung ah “APPLICATION FOR THE POST OF STATISTICAL INVESTIGATORS GRADE-III & COMPILER EXAM., 2008” chih gelhsa leng atel ngai hi. Huailou in 12 cm x 25 cm size self addressed envelope tung ah postage stamp Rs. 5 belhsa leng ngai hi.
ST/SC/OBC hihna certificate, date of birth proff-na dingin Matriculate certificate akipan a tunglam certificate/year wise marksheet photocopies telkhawmsak ngai hi.
Application form kimtaka fill-up banah document poimawh tuamtuamte tel in April 17, 2008 nitaklam dak 5.00 tana tungman ding in anuai a address ah thon ngai hi.
– Regional Director(NER),
Staff Selection Commission,
Rukmini Nagar, PO Assam
Sachivalaya, Guwahati-781006
(Detail information, application format leh a poimawh teng Employment News March 15-21, 1008 issue ah kimtak in kisuah a, huai et-theih ding hi.)
ZOUGAM.COM 
Leave a comment